Жил бүрийн даншиг намар болдог. Харин энэ жил Улсын баяр наадмын өмнөхөн болох юм. Даншиг наадам нь манай улсын шашин, өв соёлыг шингээсэн уламжлалт баяр билээ. Тиймдээ ч жуулчдын анхаарлыг ихээр татаж үндэсний хувцастай гадаад иргэд элбэг харагддаг. Шашин соёлоо сурталчлан таниулж жил бүр Гандантэгчилэн хийдийн лам хуврагууд цам харайх ёслол , ном хаялцах зэрэг буддын шашны олон зан үйл үйлдэх бөгөөд сүсэгтэн олон хүндэтгэн оролцдог юм.

Даншиг дахин сэргэсэнээсээ хойш даруй 10 жил болж түүнийгээ дагаад наадмын зохион байгуулалт сайжрсан. Тухайлбал энэ жил хүй долоон худаг хүртэл улсын чанартай зарим автозамыг шинэчилэн засвар хийж эхэлсэн байна. Мөн автозогсоол нэмж байгуулах ажил эхэлсэн. Түүнчлэн аравдугаар сард болдог нийслэлийн иргэдийн баярыг жил бүрийн 6-р сарын сүүлийн долоо хоногийн амралтын өдрүүдэд зохион байгуулах болсон учир есөн дүүргийн хүндэтгэлийн гэрүүд байршина.

Дулаан цагт хүнс, хоол үйлдвэрлэл олон асуудал дагуулдаг учир ил задгай зөвшөөрөлгүй худалдааг хатуу хорьсон. Харин явуулын хоолны машин, хоол үйлдвэрлэл зэргийг тус тусад байрлуулан зохион байгуулсан байна. Мөн хүүхдийн аюулгүй байдлыг анхаарч тоглоомуудыг зайтай байгуулж хүүхэд хуурайлах өрөөг хүртэл шийдсэн нь төлөвлөлт сайн байгааг илтгэжээ. Хүй долоон худгийн ойр орчим наадмын уур амьсгал хэдийн орж гүүгээ барьж айраг ундаагаа бэлдэх айлууд нүүн иржээ.

Наадмын хүчит 256 бөхийн барилдааны нийт шагналын сан 124.4 сая төгрөг. Энэ жил бөхийн цол чимэг олгохгүй.

Харин нэг давсан 64 бөхөд тус бүр 150 мянган төгрөгийн мөнгөн урамшуулал олгож, түрүүлсэн бөхөд 30 сая, үзүүрлэсэн бөхөд 20 сая төгрөгөөр шагнах юм байна.

Даншгийг зохион байгуулах багийнхан хэдийн гэр асраа бэлдэж, сурын талбай, үзэсгэлэнгийн сууц зэргийг байгуулжээ. Энэ жил зун оройтож хүй долоон худагт тоос ихтэй, уур амьсгал хуурай байгаа хэдий ч наадмын үеэр аадар орох магадлал өндөр тул наадамчин олон хувийн бэлтгэлээ сайтар хангахыг зөвлөж байна.