Дэлхий дахинд хиймэл оюун ухаан маш өндөр түвшинд хурдтай хөгжиж, зөвхөн автоматжуулалт төдий зүйл биш болж харин ч эсрэгээрээ салбар бүрд суурь технологи болон хувирч байна. Тэгвэл манай улсын хувьд AI буюу хиймэл оюун ухааны чиглэлд дэлхийн хөгжлөөс хоцрохгүй байхын тулд өдөр тутамдаа зөвхөн ашиглах биш хэрхэн бүтээх вэ, хэрхэн боловсон хүчнээ бэлдэх вэ гэх асуудалтай нүүр тулгарч байна.

Гэрэл зурагчин: Ц.Уламбаяр

"Бурхан хүнийг бүтээж, бусдыг нь инженерүүд бүтээдэг" гэлцдэг. Он цаг хувьсан өөрчлөгдөх тусам инженерүүдийн үүрэг оролцоогүй салбар гэж байхаа больсон. Цаашид ч улам бүр инженерчлэл дээр тулгуурласан ертөнцөд шилжиж байна. Манай Монгол Улсын хувьд инженерээр тэр тусмаа IT инженерээр сургадаг цөөнгүй сургуулиуд байдаг ч энэ нь тийм ч хангалттай биш. Зөвхөн насанд хүрсэн хойно нь их дээд сургуульд мэргэшүүлж заахаас илүүтэй багаас нь инженерчлэлийн ач холбогдлыг ойлгуулж, сонирхлыг нь татаж чадвал хүүхдүүд IT, хиймэл оюун ухааны тухай суурь ойлголттой болохын зэрэгцээ ирээдүйд улс орны хөгжилд том нөлөө үзүүлэх юм.

Яг энэхүү шаардлагыг олж харан бяцхан инженерүүдийг бэлтгэж буй STEAM HUB хөтөлбөрт 21 аймгийн 3144 хүүхэд таван төрлийн 10 түвшний сургалтад амжилттай хамрагджээ. Хөтөлбөрт хамрагдсан Говь-Алтай аймгийн суралцагч олон улсын робот, кодчиллын Enjoy AI тэмцээний дрон кодчилол төрөлд дэлхийн аваргын алтан медаль хүртсэн амжилт үзүүлээд байна.

STEAM боловсрол нь хүүхдүүдийн логик сэтгэлгээ, асуудал шийдвэрлэх чадвар, бүтээлч байдал, дижитал ур чадвар зэрэг ирээдүйн хөдөлмөрийн зах зээлд шаардлагатай чадамжуудыг хөгжүүлэхэд чиглэдэг сургалтын арга зүй юм. 2022 оноос Юнител групп “Unitel STEAM HUB” хөтөлбөрийг хэрэгжүүлж, Дархан-Уул аймагт анхны танхимаа нээн үйл ажиллагаагаа эхлүүлж байсан бол өдгөө 21 аймагт STEAM сургалтын техник, хэрэглэгдэхүүнээр бүрэн тохижуулсан 22 танхимд сургалтаа явуулахын зэрэгцээ нэмэлт арга хэмжээ, үйл ажиллагаагаараа дамжуулан сурч, хөгжихийг эрмэлздэг 65,000 гаруй хүнд цахим ур чадвар, мэдлэгээ хөгжүүлэх бодит боломжийг олгосон байна.

Хөтөлбөр нь боловсролын тэгш бус байдлыг бууруулах, STEAM боловсролын хүртээмжийг аймаг бүрд нэмэгдүүлэх, улмаар ирээдүйн инженерүүдийн эгнээг бэлтгэх нийгмийн хариуцлагын санаачилга юм байна. Тодруулбал, Монгол орны баруун хязгаар Баян-Өлгий аймгаас зүүн хязгаар Дорнод хүртэл 2370 км-ийн зайтай хоёр аймгийн хүүхдүүд яг ижил робот угсарч, ижил код бичиж, ижил лабораторид хичээллэж байна гэсэн үг. Хөтөлбөрийн үр нөлөөгөөр орон нутагт өмнө нь байдаггүй байсан STEAM сургалтын чиглэлийн төвүүд зургаан аймагт шинээр нээгдсэн нь салбарын хөгжилд эерэг нөлөө үзүүлээд байна.

Энэ талаар бэлтгэсэн мэдээллийг энд дарж үзнэ үү: https://www.facebook.com/share/v/178Yg66qu1/